எழுமாத்தூர் கனகாசல குமரன் கோயில்!

276

எழுமாத்தூர் கனகாசல குமரன் கோயில்!

ஈரோடு மாவட்டம் எழுமாத்தூர் பகுதியில் உள்ள கோயில் கனகாசல குமரன் கோயில். இந்தக் கோயிலில் கனகாசல குமரன் மூலவராக காட்சி தருகிறார். மருமகன் முருகன் கோயிலில், மாமன் பெருமாளுக்கு தனி சன்னதி அமைந்திருப்பது சிறப்பு. இங்கு, விநாயகர், சப்தகன்னிமார், பாமா ருக்குமணி சமேத கிருஷ்ணர் ஆகியோர் அருள் பாலிக்கின்றனர்.

இந்தக் கோயிலில் உள்ள கனகாசல குமரனை வழிபட நல்ல வாழ்க்கைத் துணை அமையும். மேலும், பொன், பொருள் சேர்க்கையும் உண்டு என்பது ஐதீகம். வேண்டுதல்கள் நிறைவேறிய பக்தர்கள் தொடர்ந்து ஐந்து செவ்வாய்க்கிழமைகள் இங்குள்ள முருகப்பெருமானுக்கு விளக்கேற்றி நேர்த்திக்கடனைச் செலுத்துகின்றனர்.

ஏழு கன்னிமார்களுடன் இலந்தை மரத்தடியில் வீற்றிருக்கும் விநாயகப் பெருமானும் அற்புதத் தரிசனம் தருகிறார். இங்கு வந்து அண்ணன் விநாயகரை வணங்கித் தொழுதுவிட்டு, கனகசாலக் குமரனைக் கண்ணாரத் தரிசனம் செய்து மனதாரப் பிரார்த்தனை செய்தால், நல்ல வாழ்க்கைத் துணை அமையும்; வீட்டில் பொன்னும் பொருளும் சேரும் என்பது ஐதீகம்.

தொடர்ந்து ஐந்து செவ்வாய்க் கிழமைகள் இங்கு வந்து முருகப்பெருமானுக்கு விளக்கேற்றி வழிபட்டால், பிள்ளை பாக்கியம் கிடைக்கப் பெறலாம் என்கின்றனர் பக்தர்கள். செவ்வாய்க் கிழமைகளில் இங்கு கோ பூஜை சிறப்புற நடைபெறுகிறது. அப்போது கோயிலைச் சேர்ந்த கன்றுக்குட்டி தானாகவே மலையேறிச் சென்று, பூஜை செய்யும் என்றும் கூறப்படுகிறது.

ஒரு முறை பத்தரை மாற்றுத் தங்கத்துக்காக, அகத்திய முனிவரின் அறிவுரைப்படி புலிப்பாணிச் சித்தர் இந்த மலையைக் குடைந்தபோது, முருகக் கடவுளின் அருளால் தங்கம் கிடைத்தது. ஆனால், ஏழரை மாற்றுத் தங்கம் மட்டுமே அவருக்குக் கிடைத்ததாம். எனவே இந்த ஊர் ஏழரைமாற்றூர் என அழைக்கப்பட்டு, பிறகு ஏழரைமாத்தூர் என மருவி, தற்போது எழுமாத்தூர் என மாறிவிட்டதாகச் சொல்கின்றனர் ஊர்க்காரர்கள். மலையின் பெருமையை அறிந்த ஊர்மக்கள், மலை உச்சியில் முருகப்பெருமானுக்குக் கோயில் எழுப்பினர்.

தங்கத்தைத் தந்த மலை என்பதை உணர்த்துவதற்காக, கனகாசலக் குமரன் எனும் திருநாமம் சூட்டி, கந்தக் கடவுளை வழிபடத் துவங்கினர். பிறகு, காடு-கரைகளை நிறைக்கச் செய்யவும், மாடு-கன்றுகளை பெருக்கச் செய்யவும் மலையில் கிருஷ்ணருக்குக் கோயில் எழுப்பினார்கள். பாமா ருக்மிணி சமேதராக அழகு ததும்ப ஸ்ரீகிருஷ்ணர் அருள் பாலிக்கிறார்.