மாங்கல்ய பலன் தரும் ஆடி அமாவாசை!

32

மாங்கல்ய பலன் தரும் ஆடி அமாவாசை!

ஜூலை 28-07-2022, சுபகிருது வருடம், ஆடி 12, வியாழக்கிழமை, அமாவாசை திதி இரவு 11.25 வரை ஆடி அமாவாசை பித்ரு காரியங்கள் செய்வதற்கு உரிய தினம். அமாவாசைக்கு முந்தைய தினமும்  சிறப்பானது. அன்றைய தினம் ஒரு கதையைப் படித்த பிறகு மறுநாளான அமாவாசையன்று விரதம் இருக்கும் பெண்கள்  சவுமாங்கல்யத் துடன் வாழ்வார்கள் என்பதும் உங்களுக்குத் தெரியுமா?

மாங்கல்ய பலன் தரும் ஆடி அமாவாசை விரதம்!

அமாவாசையன்று பித்ருக்கள் வழிபாடு செய்பவர்கள் மட்டுமே, விரதம் இருக்க வேண்டும் என்று சொல்வார்கள். ஆனால் சுமங்கலிப் பெண்கள் அமாவாசை முன் தினம் இந்தக் கதையைப் படித்து, மறுநாள் அமாவாசையன்று விரதமிருந்து தேவியை வழிபட்டால், மாங்கல்ய பலன் கூடுமாம்.

அழகாபுரி நாட்டு அரசன் அழகேசன். பராக்கிரமம் மிக்க  அவனுக்கு வாரிசு இல்லாத வருத்தம் இருந்தது. அதைத் தீர்த்துக் கொள்ள அவன் தன் மனைவியோடு தீர்த்த யாத்திரை மேற்கொண்டான். அதன் பலனாக அவனுக்கு ஒரு மகன் பிறந்தான். மன்னன் மகிழ்ச்சியோடு இருந்தபோது ஓர் அசரீரி எழுந்தது.  அவனது மகன், இளமைப் பருவத்தை எட்டும் போது இறந்து போவான் என்று அது சொல்லவே மன்னன் விரக்தியில் ஆழ்ந்தான்.

மன  அமைதி வேண்டி அவன் பல கோயில்க ளுக்கும் சென்றான். ஒருநாள் காளி கோயில் ஒன்றின் அவன் வழிபட்டபோது, உன் மகன்  இறந்ததும் அவனுக்கு மணம் செய்துவை. அவனது மனைவியின் மாங்கல்ய பலத்தால் அவன் உயிர் பெறுவான் என்ற குரல் கேட்டது.

இளமைப் பருவம் எய்திய இளவரசன் ஒருநாள் இறந்து போனான். மன்னன் அவனுக்கு மணம் முடிக்க பெண் தேடிய போது,பெற்றோரை  இழந்து உறவினர்களின் கொடுமைக்கு ஆளாகி வாழ்ந்த ஓர் இளம் பெண்ணை அவளது உறவினர்கள் ஏமாற்றி, இறந்து போன  இளவரசனுக்குத் திருமணம் செய்து வைத்தனர். இருட்டிய பின்னர் இளவரசன் உடலோடு அவளைக் காட்டில் கொண்டு விட்டனர்.

அப்பாவியான அந்தப் பெண் கணவன் உறங்குவதாக நினைத்தாள். விடிந்தபின் உண்மை தெரிய வந்ததும் அழுதாள்.. அரற்றினாள்..  தவித்தாள்.. தனக்குத் தெரிந்த தெய்வங்களின் பெயர்களையெல்லாம் சொல்லி வேண்டினாள்.

உலகத்தின் தாயான ஈஸ்வரி அவளது  அழுகுரல் கேட்டு இரங்கினாள். இறந்து கிடந்த இளவரசனை ஈசனின் அனுமதியோடு  உயிர்பெற்று எழச்செய்தாள். இந்த சம்பவம் நடந்த தினம் ஓர் ஆடிமாத அமாவாசை நாளில். தனக்கு அருளிய தேவியிடம் அந்தப் பெண் இருண்டு போன தன்  வாழ்வை ஒளிபெறச் செய்தது போலவே இந்த நாளில் அம்மனை வழிபடும் பெண்களுக்கும் அருள்புரிய வேண்டும் என்று வேண்டினாள்.

மகிழ்ந்த அம்பிகை, ஆடிமாத அமாவாசைக்கு  முன்தினம் அவளது கதையைப் படித்து விட்டு மறு நாள் விரதம் இருந்து மஞ்சள், குங்குமம்  உள்ளிட்ட மங்கலப் பொருட்களை உரியவர்களுக்குத் தந்து தன்னை வழிபடும் பெண்களுக்கு சுமங்கலித்துவம் நிலைக்கும் என்றும்,  அவர்கள் இல்லத்தில் அஷ்ட லட்சுமி கடாட்சம் நிலவும் எனவும் சொல்லி மறைந்தாள்.

அமாவாசை முதல் நாள் சுமங்கலிப் பெண்கள்  விரதம் மேற்கொண்டு, அமாவாசை அன்று அம்பிகையை வழிபட வேண்டும். வீட்டில் சுமங்கலிகளை அழைத்து குங்குமம், மஞ்சள் என மங்கலப் பொருள்களை தாம்புலம் தந்து உபசரிக்க வேண்டும். இயலாதவருக்கும், முதியோர்களுக்கும் அன்னதானம் கொடுக்க வேண்டும். அப்படிச் செய்தால் வீட்டில் மகா லக்ஷ்மி கடாட்சம் நீடிக்கும். மாங்கல்ய பலன் அதிகரிக்கும் .

ஆடி அமாவாசை அன்று பித்ருக்களுக்கு விரதம் இருந்து வழிபடுவது போலவே பெண்களும் தங்கள் மாங்கல்ய பலனுக்காக அம்பிகையை வழி பட்டு விரதம் இருக்க  மாங்கல்ய பலமும் மன அமைதியும் செளபாக்கிய வாழ்வும் கிட்டும்.