பெருமாள் கோயிலில் தீர்த்தம் கொடுப்பதன் நோக்கம் என்ன?

154

பெருமாள் கோயிலில் தீர்த்தம் கொடுப்பதன் நோக்கம் என்ன?

யாருக்குமே அகால மரணம் ஏற்படக் கூடாது என்ற அக்கறை இந்து மதத்துக்கு எப்பொழுதும் உண்டு. மோட்சம் அடையும் வரை, பிறந்து கொண்டே இருக்கிறான் என்று மறுபிறவியை காட்டும் தர்மம், இந்து தர்மம். சில கோயிலுக்கு சென்று வழிபட்டால் அங்கு ரிஷிகளுக்கு ப்ரத்யக்‌ஷமான தெய்வங்கள், நமக்கு அகால மரணம் ஏற்படாமல் இருக்க’ அனுக்கிரஹம் செய்வார்கள், என்று பலனாக சொல்லப்படுகிறது.

உதாரணத்திற்கு, திருவெள்ளக்குளம் என்றும் அண்ணன் பெருமாள் கோயில் என்று அழைக்கப்படும் திவ்ய தேசத்துக்கு சென்று (சீர்காழி அருகில் உள்ளது). அங்கு உள்ள ‘ஸ்ரீநிவாச பெருமாளை பக்தியுடன் வணங்கி அங்குள்ள தீர்த்தத்தில் நீராடினால், அகால மரணம் ஏற்படாது’ என்று பலன் சொல்லப்படுகிறது

வட இந்தியாவில், வெளி நாட்டில், வெகு தொலைவில் இருப்பவர்களால், வயதானவர்களால், இது போன்ற பிரத்யேகமான கோயிலுக்கு சென்று பெருமாளை வணங்கி, அங்குள்ள தீர்த்தத்தில் நீராட முடியாமல் போகலாம்.

‘யாருமே அகால மரணம் அடைய கூடாது’ என்று வேதம் ஆசைபடுகிறது. கோயிலுக்கு போக முடியாதவர்களுக்கும், அகால மரணம் ஏறபடாமலிருக்க ஒரு வழி சொல்கிறது நம் சனாதன இந்து தர்மம். சீர்காழி அருகில் இருக்கும் திருவெள்ளக்குளம் சென்று பெருமாளை தரிசித்து, அங்குள்ள குளத்தில் நீராட முடியாதவர்கள், பெருமாளுக்கு அபிஷேகம் செய்த தீர்த்தத்தை, சாளக்கிராம மூர்த்திக்கு அபிஷேகம் செய்த தீர்த்தத்தை, எடுத்து கொண்டால் கூட ‘அகால மரணம் ஏற்படாது’ என்று பலனை வேதமே சொல்கிறது.

இதனால் தான், பெருமாள் கோயிலில், தீர்த்தம் அனைவருக்கும் கொடுக்கப்படுகிறது. ‘நமக்கு அகால மரணம் ஏற்பட கூடாது’ என்று பெருமாள் ஆசைப்படுகிறார். ‘நீண்ட நாள் வாழ்ந்து கிருஷ்ண பக்தி இவன் செய்ய வேண்டும்’ என்று பெருமாள் ஆசைப்பட்டு நமக்கு நீண்ட ஆயுளை அருளிகிறார்.

கோயிலுக்குள் வரும் நம் அனைவருக்கும், தீர்த்தம் கொடுத்து, கருணையை வர்ஷிக்கிறார். அவர் செய்யும் கருணையை நாம் சிறிது நேரமாவது, நினைத்து பார்க்க வேண்டும். நம் வீட்டில் உள்ள ராம, கிருஷ்ண விக்ரஹங்களுக்கும், சாளக்கிராம மூர்த்திக்கும், உண்மையான பக்தியுடன் (அன்புடன்) அபிஷேகம் செய்து, அந்த அபிஷேக தீர்த்தத்தையும் நாம் மரியாதையோடு எடுத்து கொண்டால் கூட, அகால மரணம் ஏற்படாது.

தீர்க்க ஆயுசு பெருமாள் அருளால் கிடைக்கும். ஒவ்வொரு வீட்டிலும் அவரவர்கள் அவர்கள் வீட்டில் உள்ள தெய்வ விக்ரஹங்களுக்கு அபிஷேகம் செய்து வந்தனர். செய்து வருகின்றனர். அந்த அபிஷேக தீர்த்தத்தை பக்தியுடன் எடுத்து கொண்டனர். இதனால், இந்துக்கள் மனதில் தெய்வ சிந்தனையும் வளர்ந்தது. அகால மரணம் ஏற்படாமல், தெய்வங்கள் அணுகிரஹத்தால், ஆரோக்கியமாக 90 வயது வரை ஆஸ்பத்திரி கால் வைக்காமல் வாழ்ந்தனர். கடந்த சில பத்தாண்டுகளாக தான், இந்துக்கள் தடம் புரண்டு ஒடுகிறோம்.

ஒருவரும் தன் வீட்டில் அபிஷேகம் செய்து தெய்வ வழிபாடு செய்வதில்லை. வீட்டில் உள்ள தெய்வ விக்ரஹங்கள் மரியாதை அற்று இருக்கிறது. இப்படிப்பட்ட செயல்களால், இன்று உள்ள இந்துக்களுக்கு மனதில் தெய்வ சிந்தனையை விட, கீழ் தரமான சிந்தனைகள் பல எழும்புகிறது.

அகால மரணத்தை நோக்கி, பல நோய்கள் இளம் வயதிலேயே வருகிறது. இந்துக்கள் கொஞ்சம் சிந்திக்க வேண்டும். தெய்வ பக்தி வளர நாம் முயற்சி செய்ய வேண்டும்.

அகால ம்ருத்யு ஹரணம், சர்வ வியாதி நிவாரணம், சமஸ்த பாபக்ஷய ஹரம், விஷ்ணு பாதோதகம் சுபம் என்கிறது வேத வாக்கு. விஷ்ணுவின் பாதத்தில் பட்ட தீர்த்தம் அகால மரணத்தை நீக்க கூடியது, அனைத்து வியாதியும் போக்க கூடியது. அனைத்து பாவத்தையும் போக்க கூடியது என்று வேதமே சொல்கிறது.

மஹா விஷ்ணுவின் கால் நகத்தில் பட்டு ஓடி வந்ததால் தான், கங்கை நதிக்கே ‘புண்ணியநதி’ என்று பெயர் கிடைத்தது என்றால், நாம் செய்யும் அபிஷேகம் தீர்த்தம், நாம் கோயிலில் பெறும் அபிஷேக தீர்த்தம், எத்தனை மகத்துவம் வாய்ந்தது என்று புரிந்து கொள்ள வேண்டும். கோயிலில் பெருமாள் தீர்த்தத்தை வாங்கும் போது, இடது கையில் துணியை வைத்துக்கொண்டு, அதன் மேல் வலது கையால், ஜாக்கிரதையாக அபிஷேக தீர்த்தத்தை வாங்கி கொள்ள வேண்டும்.

நம்முடைய காலிலேயே தீர்த்தம் சிந்தி விடாமல், பெருமாள் அபிஷேக தீர்த்தம் என்ற மகத்துவம் தெரிந்து வாங்கிக்கொள்ள வேண்டும். பெருமாள் அபிஷேக தீர்த்தத்தை, கொடுப்பவரும் ஜாக்கிரதையாக கொடுக்க வேண்டும். அகால மரணத்தை தடுக்கும் அருமருந்து என்ற ஞாபகத்துடன், கங்கை நதியே இவர் கால் நகம் பட்டதால் தான், புண்ணிய நதியாக ஒடுகிறாள் என்ற ஞானத்துடனும், அபிஷேக தீர்த்தத்தை எடுத்து கொள்ள வேண்டும்.

பகவானுடைய பாத தீர்த்தத்தை பருகியவன் ‘அல்ப ஆயுசாக போக மாட்டான்’. “சரத்தையும் (நம்பிக்கை), பக்தியும் (பெருமாளிடம் அன்பு)” இருந்தால், நீண்ட ஆயுசு உண்டாகும், எந்த நோயும் சரியாகும்.

நோய் வருவதற்கு காரணம் –

நாம் செய்த பாவங்களே

ஆயுள் குறைவுக்கு காரணமும் –

நாம் செய்த பாவங்களே

சரத்தையும் (நம்பிக்கை), பக்தியும் (பெருமாளிடம் அன்பு)’ இருந்து, பகவானுடைய பாத தீர்த்தத்தை பருகியவனுக்கு, அவனிடம் உள்ள பாபங்களும் பொசுங்கி போகும் என்று வேதமே சொல்கிறது.

கோயிலில் நாம் பெற்றுக்கொள்ளும் பெருமாள் தீர்த்ததுக்கு இத்தனை மகத்துவம் உண்டென்றால், பெருமாளிடம் சரத்தையும் (நம்பிக்கை), பக்தியும் (பெருமாளிடம் அன்பு) வைக்க நமக்கு என்ன தடை இருக்க முடியும்?

பெருமாளின் பாத தீர்த்ததுக்கு அத்துனை பெருமை உண்டு என்று அறிந்து, “நம் பெருமாள்” என்று ஆசையுடன், நாம் அனைவரும் பக்தி செய்வோம். அதே சமயம் மரியாதையுடன் தெய்வ சந்நிதியில், பெருமாள் நம்மை பார்க்கிறார் என்ற கவனத்துடன் செயல்படுவோம்.

எனவே பெருமாள் கோவிலில் நாம் தீர்த்தம் பெற்றுக்கொள்ளும்போது

அகால ம்ருத்யு ஹரணம்

சர்வ வியாதி நிவாரணம்

சமஸ்த பாபக்ஷய ஹரம்

விஷ்ணு பாதோதகம் சுபம்

என்ற ஸ்லோகத்தை மனதிற்குள் சொல்லியபடி தீர்த்தத்தை சிந்தி விடாமல், நமது அகால மரணத்தை தவிர்க்க கூடிய பெருமாள் அபிஷேக தீர்த்தம் என்ற மகத்துவம் தெரிந்து அருந்த வேண்டும் என்பது குறிப்பிடத்தக்கது.