வீட்டில் எந்தெந்த இடங்களில் தீபம் ஏற்ற வேண்டும்?

92

வீட்டில் எந்தெந்த இடங்களில் தீபம் ஏற்ற வேண்டும்?

வீட்டில் எந்த இடங்களில் தீபம் ஏற்றினால் என்ன பலன் கிடைக்கும் என்பது குறித்து இந்தப் பதிவில் நாம் காண்போம். நாம் வாழும் வீட்டில் காலை மற்றும் மாலை என்று இரு வேளைகளிலும் தீபம் ஏற்றி வைத்து அந்த தீபத்தை நமஸ்காரம் செய்தால் தீய சக்திகள் யாவும் விலகி, வீட்டில் லட்சுமி கடாட்சம் பெருகும் என்பது ஐதீகம்.

மேலும், தீபம் ஏற்றி வைத்து வழிபாடு செய்வதன் மூலம் சுபம், ஆரோக்கியம், நன்மை, தன வரவு அதிகரித்தல் ஆகியவை ஏற்படும். தீபங்களுக்கு என்று ஒரு வழிபாடு பின்பற்றப்பட்டு வருகிறது.

தீபம் ஏற்ற வேண்டிய இடங்களும், விளக்குகளும்:

கோலமிடப்பட்ட வாசலில் – ஐந்து விளக்குகள்

திண்ணைகளில் – நான்கு விளக்குகள்

மாடக்குழிகளில் – இரண்டு விளக்குகள்

நிலைப்படியில் – இரண்டு விளக்குகள்

நடைகளில் – இரண்டு விளக்குகள்

முற்றத்தில் – நான்கு விளக்குகள்

பூஜையறை:

இரண்டு கார்த்திகை விளக்குகள் ஏற்றி வைத்து வணங்கினால் சர்வ மங்கலங்கள் உண்டாகும்.

சமையலறை:

ஒரு விளக்கு ஏற்றி வைத்து வணங்கினால் அன்ன தோஷம் ஏற்படாது.

தோட்டம் மற்றும் வெளிப்பகுதி:

எமனை வேண்டி தீபம் ஏற்ற வேண்டும். இதனால் மரண பயம் நீங்கும். ஆயுள்விருத்தி உண்டாகும்.

தீபத்தின் வகைகள்:

தீபத்தில் மகாலட்சுமி வசிப்பதால், தீபம் ஏற்றியதும் தீபலட்சுமியே நமோ நம என்று கூறி வணங்குவது அவசியம். தீபத்தில் பலவகைகள் உண்டு. அவை

சித்ர தீபம்:

வீட்டின் தரையில் வண்ணப் பொடிகளால் சித்திரக் கோலம் இட்டு, அதன்மீது ஏற்றப்படும் தீபம் சித்ர தீபம் ஆகும்.

ஜல தீபம்:

தீபத்தை ஏற்றி நதி நீரில் மிதக்கவிடப்படும் தீபத்திற்கு ஜல தீபம் என்று பெயர்.

மாலா தீபம்:

அடுக்கடுக்கான தீபத் தட்டுகளில் ஏற்றப்படும் தீபம் மாலா தீபம் ஆகும்.

ஆகாச தீபம்:

வீட்டின் வெளிப்புறத்தில் உயர்ந்த பகுதியில் ஏற்றிவைக்கப்படும் தீபம் ஆகாச தீபமாகும். கார்த்திகை மாதம் சதுர்த்தி திதிநாளில் இந்த தீபத்தை ஏற்றி வழிபட்டால், எம பயம் நீங்கும்.

மாவிளக்கு தீபம்:

அரிசி மாவில் வெல்லம் போட்டு, இளநீர் விட்டுப் பிசைந்து உருண்டையாக்கி, நடுவில் குழித்து நெய் ஊற்றி திரிபோட்டு ஏற்றுவது மாவிளக்கு தீபம் ஆகும்.

அகண்ட தீபம்:

மலையுச்சியில் பெரிய கொப்பரையில் ஏற்றப்படுவது அகண்ட தீபம் ஆகும்.

சர்வ தீபம்:

வீட்டின் அனைத்து பாகங்களிலும் வரிசையாக ஏற்றிவைக்கப்படுபவை சர்வ தீபமாகும்.

மோட்ச தீபம்:

முன்னோர் நற்கதியடையும் பொருட்டு, கோயில் கோபுரங்களின் மீது ஏற்றி வைக்கப்படும் தீபம் மோட்ச தீபம் ஆகும்.

படகு தீபம்:

கங்கை நதியில் மாலைவேளையில் வாழை மட்டையின் மீது தீபம் ஏற்றிவைத்தும், படகு வடிவங்களில் தீபங்கள் ஏற்றி வைத்தும் கங்கையில் மிதக்கவிடுவதற்கு பெயர் படகு தீபம் ஆகும்.

லட்ச தீபம்:

ஒரு லட்சம் விளக்குகளால் கோவிலை அலங்கரிப்பது லட்ச தீபமாகும்.

சர்வாலய தீபம்:

கார்த்திகை மாதம் பௌர்ணமி அன்று, மாலைவேளையில் சிவன் கோவில்களில் ஏற்றப்படுவது சர்வாலய தீபமாகும்.