செய்த பாவங்கள் நீங்க செய்ய வேண்டிய பரிகாரம்!

88

செய்த பாவங்கள் நீங்க செய்ய வேண்டிய பரிகாரம்!

முன் ஜென்மத்தில் செய்த பாவங்கள் அனைத்தும் பல தலைமுறைகளைக் கடந்து குடும்பத்தில் பாதிப்பை ஏற்படுத்துவது உண்டு. தெரிந்தோ, தெரியாமலோ காலங்காலமாக செய்த பாவங்களிலிருந்து மீள முடியாமல் போராடி வருவது உண்டு. என்னதான் ஜாதகத்தைப் பார்த்தாலும் கண்ணுக்கு தெரியாத ஏதோ ஒரு சாபத்தாலோ, பாவத்தாலோ நம்மை மட்டுமின்றி நமது தலைமுறையையும் பின் தொடர்கிறது என்று பலரும் சொல்வது உண்டு.

சரி, செய்த பாவங்கள் நீங்க என்னதான் பரிகாரம் செய்ய வேண்டும் என்பது குறித்து இந்தப் பதிவில் காண்போம். எவ்வளவு பெரிய பிரச்சனையாக இருந்தாலும் சரி, கஷ்டமாக இருந்தாலும் சரி முதலில் குல தெய்வத்தை வழிபட வேண்டும். குல தெய்வத்தின் அருள் இருந்தால் மட்டுமே மற்ற தெய்வத்தின் அருள் கிடைக்கும். மாதத்திற்கு ஒரு முறையோ அல்லது இரண்டு மாதங்களுக்கு ஒரு முறையோ குல தெய்வ கோயிலுக்கு சென்று வழிபாடு செய்வது நல்லது.

இது தவிர மற்றொரு பரிகாரமாக, இயற்கையாக கிடைக்கும் மூலிகை செடிகள் சொல்லப்பட்டுள்ளது. அது என்ன என்றால், விநாயகருக்கு எப்படி அருகம்புல் பிடிக்குமோ, அதே போன்று சிவனுக்கு வில்வம், பெருமாளுக்கு துளசி, அம்மனுக்கு வேப்பிலை என்று ஒவ்வொரு தெய்வத்திற்கும் ஒவ்வொரு இலை மிகவும் விசேஷம். இந்த இலைகளைக் கொண்டு என்ன பரிகாரம் செய்யலாம் என்று பார்க்கலாம்.

துளசி, வேப்பிலை, அருகம்புல், அரச இலை, வில்வம் ஆகியவற்றை எடுத்துக் கொள்ள வேண்டும். முப்பத்து முக்கோடி தேவர்களும் அரச இலையில் வாசம் செய்வதாக ஐதீகம். இந்த 5 இலைகளையும் முதலில் தண்ணீரில் கழுவி விட வேண்டும். அதன் பிறகு ஒரு தாம்பூல தட்டில் வைத்துவிட்டு அதற்கு நடுவில் ஒரு அகல் விளக்கை வைத்து நல்லெண்ணெய் கொண்டு தீபம் ஏற்றி பூஜையறையில் வைக்க வேண்டும்.

தீபத்திற்கு முன்பு அமர்ந்து இறைவனை பிரார்த்தனை செய்ய வேண்டும். அது முன்னோர்கள் சாபமாக இருந்தாலும் சரி, பிரேத சாபமாக இருந்தாலும் சரி, பெண் சாபமாக இருந்தாலும் சரி, முனி சாபமாக இருந்தாலும் சரி, தேவர்கள் சாபமாக இருந்தாலும் சரி, குல தெய்வ சாபமாக இருந்தாலும் சரி ஒட்டுமொத்தமாக அனைத்தும் நீங்கும்.

தனியாக செய்யும் போது கிடைக்கும் பலனை விட குடும்பத்தாருடன் சேர்ந்து செய்தால் இரட்டிப்பு பலன் கிடைக்கும் என்பது ஐதீகம்.