கைத்தமலை வெற்றி வேலாயுதசுவாமி கோயில் – புராணக் கதைகள்!

86

கைத்தமலை வெற்றி வேலாயுதசுவாமி கோயில் – புராணக் கதைகள்!

ஈரோடு மாவட்டம் கதித்த மலை (கைத்தமலை முருகன் கோயில்) என்ற ஊரில் உள்ள கோயில் வெற்றி வேலாயுதசுவாமி கோயில். இந்தக் கோயிலில் வெற்றி வேலாயுதசுவாமி மூலவராக காட்சி தருகிறார். தனி கோயிலில் வள்ளி, தெய்வானை அருள் பாலிக்கின்றனர். முருகப் பெருமான் உண்டாக்கிய தீர்த்தம் மலை மீது உள்ளது. ஒவ்வொரு ஆண்டும் தைப்பூசம், வைகாசி விசாகம், கந்த  கந்த சஷ்டி  ஆகிய நாட்களில் திருவிழா நடக்கிறது. இந்தக் கோயிலில் வள்ளி தெய்வானை தனிக்கோயிலிலும், முருகன் தனிக் கோயிலிலும் அருள் பாலிக்கின்றனர்.

குன்றின் மீது 5 நிலை கொண்ட ராஜகோபுரம் கிழக்கு நோக்கி நிற்கிறது. கோயிலுக்கு செல்ல அகலமான படிக்கட்டுகள் உள்ளன. ராஜகோபுரத்தின் முன்னால் தீப ஸ்தம்பம் உள்ளது. பிரகாரமும் இருக்கிறது. முருகனின் கண தலைவரான இடும்பனுக்கு தனி சன்னதி உள்ளது.

முருகனின் கோயிலுக்கு கீழே தென்கிழக்கு பக்கம் உள்ள பாம்பு புற்றுக்கு தனி கோயில் உள்ளது. இது மயூரகிரி சித்தரின் சமாதியாக இருக்கலாம் என்று கருதப்படுகிறது. இதற்கு ஒவ்வொரு அமாவாசை அன்றும் சிறப்பு வழிபாடு செய்யப்படுகிறது. பக்தர்கள் இந்த புற்றை சுப்பராயர் என்று அழைக்கிறார்கள். வள்ளி தெய்வானை சன்னதிக்கு செல்லும் வழியில் பாலை மரத்தின் அடியில் காவல் தெய்வமான சுக்குமலையான் சன்னதி உள்ளது.

குழந்தை பாக்கியம் வேண்டுபவர்கள் சுக்கு மலையானை வழிபாடு செய்கிறார்கள். திருமணத்தில் தடை உள்ளவர்கள், பிரிந்த தம்பதியினர் மீண்டும் ஒன்று சேரவும் இந்தக் கோயிலில் வழிபாடு செய்கிறார்கள். முருகனுக்கு பால் அபிஷேகம் செய்து புது வஸ்திரம் சாற்றி வழிபாடு செய்கின்றனர்.

குன்று இருக்கும் இடமெல்லாம் குமரன் இருப்பான் என்பதற்கேற்ப ஈரோடு மாவட்டத்திலுள்ள ஊத்துக்குளி கதித்த மலையில் முருகப்பெருமான் அருள் பாலித்து வருகிறார். அருணகிரிநாதரால் பாடல் பெற்றதும், அகத்தியர் பூஜித்த பெருமை பெற்றதுமான இத்தலம் சிறந்த பிரார்த்தனை தலமாக விளங்குகிறது.

கோயிலில் மூலவரான வெற்றி வேலாயுதசுவாமி வள்ளி தெய்வானை இல்லாமல் தனியாக நின்ற கோலத்தில் அருள் பாலிக்கிறார். இதற்கு என்ன காரணம் என்றால், சூரபத்மனை வதம் செய்த பிறகு முருகன் தனிமையில் இருந்தார். அவரை மணம் முடிக்க வள்ளி, தெய்வானை ஆகியோர் இமயமலைக்கு வந்து முருகன் தங்களை ஆட்கொள்ளுமாறு வேண்டினர்.

அவரது அருளாசியின்படி இந்திரனின் மகளாக தெய்வானையும் நம பிராஜனின் வளர்ப்பு மகளாக வள்ளியும் அவதரித்தனர். திருமணத்துக்கு முன்னதான நிலை என்பதால், இவர்களுக்கு தனி சன்னதி தரப்பட்டுள்ளது. மற்றொரு காரணமும் சொல்லப்படுகிறது. வள்ளி, தெய்வானை, வேல் ஆகியவை இச்சாசக்தி, கிரியாசக்தி, ஞானசக்தி ஆகியவை ஆசை, செயல், அறிவு என்று 3 சக்திகளை குறிக்கின்றன. இவை மூன்றும் பரப்பிரம்மமாகிய முருகனுக்குள் அடங்கியுள்ளது.

பெரும்பாலான முருகன் கோயில்களில் இச்சா சக்தியும், கிரியா சக்தியும் அவருக்கு இருபக்கம் வைக்கப்பட்டு, ஞான சக்தியான வேல் மட்டும் அவரது மார்பின் மேல் வைக்கப்படும். ஞான சக்தி தான் இம்மூன்றில் முக்கியமானது. இச்சையும், கிரியையும் இருந்தால் தான் ஞானம் பெற முடியும். ஆனால், அபூர்வ சக்தி படைத்த முருகன் இவ்விரண்டும் இல்லாமல் ஞான சக்தி பெற்றவர் என்பதையும் இது காட்டுகிறது.

முருகப் பெருமான் குடி கொண்டுள்ள தலங்களுக்கு எல்லாம் அகத்தியர் தரிசிக்க சென்றார். அவருடன் நாரதர் மற்றும் பல தேவர்களும் உடன் வருகின்றனர். பூஜைக்குரிய நேரம் வந்ததும் அகத்தியர் ஓரிடத்தில் முருகனுக்கு பூஜை நைவேத்தியம் செய்ய நீரின்றி தவித்தார். அவருக்கு தாகமும் ஏற்பட்டது. இதனால் முருகப் பெருமானை வேண்ட முருகன் அங்கு தோன்றினார். தம் வேலை தரையில் குத்தி ஒரு ஊற்று ஏற்படுத்தினார். நீர் பெருக்கெடுத்து ஓடியது.

அகத்தியரும் மகிழ்ச்சியுடன் பூஜைகளை முடித்து கொண்டு தன் தாகத்தையும் தீர்த்துக் கொண்டார். முருகனால், அன்று ஏற்படுத்தப்பட்ட ஊற்று வற்றாமல் இன்று வரை நீரை கொடுத்துக் கொண்டிருக்கிறது. குழியில் இருந்து ஊற்று தோன்றியதால், ஊத்துக்குளி என்று அப்பகுதி அழைக்கப்பட்டது. இந்த அற்புதத்தை நிகழ்த்திய முருகனுக்கு கோயிலும் கட்டப்பட்டது.